Сайты дзяржаўных органаў улады ў Брэсцкай вобласці абяцаюць зрабіць на беларускай мове

На гэты момант ніводзін сайт райвыканкамаў і гарвыканкамаў у рэгіёне не мае беларускамоўнай версіі, але чыноўнікі абяцаюць выправіць сітуацыю.

Сайты дзяржаўных органаў улады ў Брэсцкай вобласці абяцаюць зрабіць на беларускай мове
Фото: На гэты момант ніводзін сайт райвыканкамаў і гарвыканкамаў у рэгіёне не мае беларускамоўнай версіі, але чыноўнікі абяцаюць выправіць сітуацыю. Фото Алег Супрунюк

Як адзначыў юрыст Ігар Случак, ў створаных раздзелах беларускамоўнай вэрсіі Баранавіцкі, Бярозаўскі, Ганцавіцкі, Івацэвіцкі, Ляхавіцкі, Пінскі, а таксама астатнія гарадскія і раённыя выканкамы ўсю інфармацыю падаюць на рускай мове. Адпаведна, немагчыма даслаць зварот як у беларускамоўнай, так і ў рускамоўнай версіі сайта.

“Адсутнасьць беларускай мовы на сайтах дзяржаўных установаў — гэта грубае парушэнне заканадаўства і правоў чалавека”, — лічыць Ігар Случак.

Ён перакананы, што неабходна абараняць свае правы (не толькі моўныя, але і іншыя), бо інакш ніякіх правоў не застанецца.

“Варта патрабаваць выкананьня заканадаўства праз звароты і заявы. Людзі сваімі актыўнымі або пасіўнымі паводзінамі вызначаюць будучыню”, – упэўнены юрыст.

Паводле меркавання Ігара Случака, адпаведны прыклад мусіць падаваць кіраўніцтва абласной “вертыкалі”, аднак змест сайта Брэсцкага аблвыканкама – пры фармальнай наяўнасці беларускамоўнай версіі – амаль цалкам зроблены на рускай мове. Зрэшты, не выключана, што адбудуцца станоўчыя змены.

Адказ з Брэсцкага аблвыканкама наконт беларускамоўных версій сайтаў . Фота Ігара Случака

Прынамсі ў адказе на імя Ігара Случака намеснік старшыні Брэсцкага аблвыканкама Генадзь Барысюк запэўніў, што “тэхнічнае заданне дзяржаўнай закупкі паслугаў на бягучы год” прадугледжвае беларускамоўныя версіі сайтаў выканаўчых камітэтаў усіх узроўняў.